Бум-Эрдэнэ ахын тоглоомд оролцсу 2

За Зараа ахыгаа гомдоож тэнгэр ниргэхээр зүйл болсон шүү. Ах минь та юунд уурлан хилэгнэнэ вэ? Таныг уурласан гээд тэнгэр намайг ниргэх гээд... би ч айж хурдалаад ...

Зиак, Хүү найзын хэлсэнээр хархаасаа өмнө бодож байснаа бичье.

Зараа ах

Би Зараа ахыг таарсан мах шөлтэй, их царайлаг хүн байдаг болов уу гэж бодож байсан. За тэр үнэн болж таарав. CPU гацах шахсан шүү. Царайлаг хүмүүстэй харьцах бас хэцүү байгаа биз. Маш сайн үзүүлэлттэй “гомпүүтэртэй” л байхгүй бол. Бас тэгээд их инээж явдаг хүн болов уу. Хүн хүнээр тоглоом хийгээд л. Бас их хошин шогийн мэдрэмжтэй байх гэж бодож байсан. За тэр бол заавал уулзаад мэдчих зүйл биш бичлэгүүдээс нь харагдаж байдаг шүү дээ. Би бас Зараа ахыг сахалтай байж магадгүй гэж бодож байсан, буруу болж таарсан. Сахалгүй нөхөр байна лээ. Зараа ахад сайхан эр хүн болоход одоо ганц сахал л үлдлээ дээ (бөх зүрх гарган инээв)

Гамп

За Гамп хүү. Би Гампыг өндөр нуруутай, цагаан царайтай, хараа булаам сайхан залуу байх гэж яагаад ч юм бодож байсан шүү. Гүй ээ яахав, зураг нь бол төстэй л юм байна лээ. Хамар нь өндөр шулуун, алагласан нүдтэй. За за тоглосон юм.

Би Гампыг дундаж нуруутай, компютэр шагайж суудаг, элдэв хошин зүйл уншихаараа чимээ гарган чанга инээдэг, нийтэч, шооч тийм хүн байдаг болов уу гэж бодож байсан. Байсан гэж бодсоор ч байгаа л даа. Пивоны гүзээтэй (гэхдээ том биш), уугаад эхлэхээрээ “Ягаан Будда” болдог нөхөр байх. Ярина гэж “баллаж өгдөг” нөхөр болов уу. Хэрэв нухацтай зүйл гарвал их хөмсөг зангидан сууж гүн бодолд дарагддаг нөхөр байх. Хөмхийгөө зуудагч байж мэдэх юм.

(би Гампыг чи л гээд байдаг юм. Хэрэв яг уулзахаар болоод нүүр тулвал та болох байхдаа. хэхэ)

Арсун ах

Таарсан махтай шөлтэй, 175 см өндөртэй, нүдэнд дулаахан, сургамжтай яриагаараа бусдын анхаарлыг өөртөө татаж чаддаг байх гэж төсөөлөгдөх юм. Ёс уламжлалаа сайн мэддэг болохоор бэр гуйлгахаар хүмүүс уриж залдаг байх. Нэг л сайхан налайж суудаг байх гэж бодогдоод байдаг. За би сахалтай байх гэж бодож байна. Яг миний аавынх шиг байх гэж яагаад ч юм төсөөлөгдөж байна. Нэг дүүдээ зургаа явуулаарай, үнэн үү? Худлаа юу? Аан бас, духандаа үрчлээтэй байх.

Чандмань ах

Би гүзээтэй гэдэгт их итгэлтэй байна. (гэмгүй цайлганаар инээв) Нэг л их дуугүй, бодлогоширсон хүн байх гэж бодогдох юм. Нэг дууг бүтэн өдөржин сонсчихдог гэхээр бараг л үнэн байх. Хоёр гараа гэдсэн дээрээ тавиад, хөлөө жийн суудаг юм шиг тархинд “бууж” байх юм. Инээмсэглэхэд нь нүднийх нь тушаа үрчлээ гардаг байх.

Заяа эгч

Зээ хөө, эгч минь ямар хүн гэж надад төсөөлөгдөж байна вэ гэвэл: Би яагаад ч юм Японд амьдардаг байх гэж бодож байсан чинь Улаанбаатартаа л амьдардаг юм байна лээ шүү дээ. За би их ажилд махруу, бие нь чийрэг гэж бодож байна. Бордуу царайтай, дундаж нуруутай. Хүчтэй байх гэж бодогдох юм. Бие нь дундаж, тарган ч биш, туранхай ч биш. Юмыг сонирхон хархаараа яг л хүүхэд шиг болж духаа тэнийлгэж байгаад инээдэг болов уу. Халамжтай хань, эх гэдэг нь эргэлзэхгүй байна.

Хүү

Би Хүүтэй уулзаж байсан болохоор гаднах төрхийг нь мэднэ. Би Хүүг өндөр нуруутай, шулуун хамартай, царайлаг залуу байх гэж бодож байсан. Өндөр нурууг эс тооцвол яг шүү ер нь. Их л инээсэн хүүхэд шиг зантай хүн байна лээ. Дээр нэг хүн надад хүүхэд шиг зантай гэж хэлж байсан, тэр үнэн болж таарсан шүү. Бас их дурламтгай байх тээ? (малийв)

Гранола

Гранола эгчийн блогыг уншиж чадахаа байгаад удаж байна. Гэхдээ бодож явдагаа бичюү. Их боловсролтой, сайн ажил мэргэжилтэй, өндөр орлоготой, дундаж нуруутай, гуалиг, царайлаг, ажил хэрэгч бүсгүй байх. Үсээ шууж явдаг, албаны хослол өмсдөг тийм л эмэгтэй болов уу.

Үүжийм

За энэ нөхрийн хоолойг нэгэнтээ сонсож байсан удаатай. Их л хүүхэд шиг сонсогдсон шүү. Нэг тийм жаахан биетэй, биендээ таарсан “мах шөлтэй”, бордуу царайтай, нүдээрээ инээдэг. Инээхээрээ гараараа амаа дардаг, чанга дуу гаргадаг байх. Интернэтээр бас дажгүй хэсчихдэг нөхөр болов уу. Их ярилцах дуртай гэсэн, тиймээс их л нээлттэй хүн болов уу. Найз залуу, нөхөртэй эсэхийг нь мэдэхгүй юм. Байхгүй бол залуус надаас утсыг нь авч болно шүү (гэсэн хэхэ)

Сирус

Энэ залуу их дуугүй, бодлогоширсон, кино үзэж, ном уншин, дуу сонсох дуртай нэгэн байх. Өндөр, цагаан царайтай, царайлагдуу болов уу. Болохгүй зүйл гарвал нүүрэнд нь шууд илэрдэг байх. Дүнсгэр царай гарган аливааг эргэцүүлэн суудагч байж магадгүй. Хэрэв аливааг таашаахгүй бол доогтойгоор инээдэг байх гэж бас яагаад ч юм бодогдох юм. За энэ миний л бодол шүү. Мэдэх хүмүүс нь залруулаарай.

Melkadies

За Melkadies минь, би таны эр эм алин болохыг мэдэхгүй шдээ. Эхлээд эмэгтэй гэж бодож байсан, одоо яагаад ч юм эрэгтэй байх гэж бодогдоод байна. Эмч мэргэжилтэй гэсэн болохоор нүдний шилтэй байх. Хүнд туслая гэсэн сайхан сэтгэлтэй болов уу. Цагаан халат нөмөрч явдаг нь тодорхой. Цагаан царайтай, царайлаг байх гэж бодогдож байна. Хүнд өвчтөнийг хараад хөмсөг зангидан сувилагчаас юм бэлдэж өгөхийг гуйдаг тйим эмч л санаанд бууж байна даа. Өндөр нуруутай, үсээ хагалж самнадаг байх.

Золоо

За бичкэн блоггэр байнаа. Их дүрсгүй жаал байх чи тийм үү? Ангийн атаман, эсвэл ангийн дарга. Магадгүй сургуульдаа нэртэй нэгэн байх. Хүүхдүүдийг уриалан аливааг хийхдээ гарамгай нэгэн ба урлагын үзлэг, сагс, спортын тэмцээнд алгасахгүй манлайлан оролцдог болов уу. Математикдаа хэр вэ хөө “нөхөөр чи”? Хичээл тасалж компютер их тоглодог байж магадгүй гэж бодогдоод явчихлаа. Хэрэв тийм бол эгчийн зүгээс хэлхэд “Дэмийрч болноо, халуурч болохгүй” шүү. За байз, сагс тоглодог болохоор өндөр, охидыг гүйлгэдэг царайлаг хөвгүүн байх. Зиа би ингэж л бодож байна даа.