Эрэгтэй хүн - Аав

Эрэгтэй хүн гэдэг цуврал бичлэг бичхээр шийдлээ. Бичлэг гэж дээ, бараг л захиа гэмээр дээ.

Миний амьдралдаа хамгийн ихээр хайрлан хүндэлдэг хүн аав минь билээ. Эцэг хүн охин үрдээ харам, охин үр аавдаа амь байдаг гэлцдэг. Тиймээ, аав бид 2 яг л тийм. Таньдаа би ямар их хайртай вэ, бас таныгаа би ямар ихээр санана вэ. Хамтдаа байхдаа намайгаа эрхлүүлээл, би таньдаа эрхлээл.

Ээжээс илүү би аавтайгаа л хамт байдаг байлаа. Цалин буугаал надаа Сникерс авч өгдөг байсан даа. Одоо би харин Сникерсийг зөвхөн аавыгаа санасан үедээ л иддэг. Аавтай минь холбогдолтой нэгэн дурсамж ийм.

Аав минь жил дараалсан 2 удам залгах хүүтэй тул охин үрийг их хүссэн гэдэг. Ээж ч хүүхэд олж, хөгшрөх насанд олсон хүүхдээ хоёул гаргахаар шийдсэн. (тэр үр нь би шүү дээ) Орой унтахаар хэвтэхдээ аав минь өдрөөс өдөрт өсөн торниж, эхийн хэвлийд тарвалзаж байгаа намайг охин үр байгаасай гэж шивнэдэг байсан гэдэг. 1988 оны 6р сарын 5 ны тэр нэгэн өдөр аав минь амьдралдаа хамгийн ихээр хүссэн тэр хүүхдээ хорвоо дэлхийд хүлээн авсан билээ. Төрөхийн цонхоор ээж намайг аавд харуулаад охин хүүхэд гэж ойлгуулахад аав маш их баярласан гэнэ лээ. Тэгээд аав минь төрсөн ганц эгч дээрээ очоод охин үртэй боллоо гээд бяцхан баяр тэмдэлээд дараа нь гэр рүүгээ 2 ахад минь хэл дуулгах гээд алхсан гэдэг. Манай гэр тэр үед Баянхошууд байдаг байлаа. Ээж аавыг хэдэн км алхсан бол гэж одоо болтол яридаг. Нээрээ ч аав минь хэдэн км алхсан болдоо. Гэр хүрэх зай хол байсан ч амьдралдаа хайрлан нандигнаж явах Сувдтай болсондоо баярлаад огтхон ч ядраагүй байх, сэтгэл нь дотроосоо халаад оройн хүйтнийг ч мэдрээгүй байх.

Ээж бид 2 саяхан аавын тэмдэглэлийг олж уншсан. Ямар нандин бичлэг олсон гээч.

... Expired these sentences...

Цэг таслал ч алдаагүй аавын минь бичсэн тэмдэглэл. Наддаа та минь ямар их хайртай байгаав дээ. Таныгаа би чинь бас ямар ихээр хайрладаг вэ. Хорвоогоос халин одоод хэдийн 12 жил өнгөрчээ. Гэхдээ таньтайгаа өнгөрүүлсэн мөч бүхэн минь өчигдөрхөн болсон мэт тод санагдана. Цаг хугацаа бүхнийг шийдэж, орхин явсан таныг минь мартагдуулна гэж олон хүн хэлж байсан боловч мартаагүй ээ охин нь, огтхон ч мартаагүй. Оройд таныгаа зүүдэлдэг, санан гансарч уйлдаг, зургыг чинь хараад үнсдэг.

Дахиад ганцхан л харах юмсан, дахиад ганцхан л удаа тэврүүлээд үнсүүлэх юмсан, дахиад ганцхан л удаа таныхаа сахлыг бичкэн гараараа, жаахан хуруугаараа ирмэх юмсан. Намайг үнсэх болгонд тань эрүүний тань сахал загатнуулдаг байж билээ. Гижиг хүрээл инээнэ, таныхаа хүзүүг тэвэрч аваал дахин дахин үнсүүлэх гээд л наалдана. Та ч намайгаа үнсээд л, эрхлүүлээд л... Хором мөч бүхэн харамламаар. Хайран, дэндүү хайран.

Аав минь тэнгэрийн хүн. Тэнгэрт дүүлэн нисдэг нисгэгч хүн. Дүрэмт хувцасаа өмсөөд сайхан цэмцгэр алхаагаа, цэх шулуун нуруугаа, нүдэнд дулаахан төрхөө, сэтгэл татам зангаа гайхуулан алхдаг түүнийг харсан хэн ч жинхэн эр хүн, жинхэн эцэг, жинхэн нисгэгч гэж бодно.

6н настай байхдаа би аавтайгаа хамт нисэж билээ. Би тэр үед нисгэгчийн кабинд орсон нь миний амьдралын хэзээ ч мартагдахааргүй, хамгийн нандин дурсамж. Яг үүлэн дээр алхах мэт, аавтайгаа хөтлөлцөөд тэнгэрт дүүлэн нисэж, үүлэн дээр саатаад ...

Санаж байнаа таныгаа, санаад байна. Орхиод явсныг чинь бодохоор маш их гомддог ч надаа л ухаан суулгах гэж та минь явсан байхдаа гэж бодоод ямар их үнээр олдсон ухаарал вэ гэж халагладаг. Амьдрал гэж ямар хатуу болохыг ойлгуулах гэж, алхам тутамдаа ухаалаг хөдлөх хэрэгтэйг мэдрүүлэх гэж та намайг орхиод явсан тиймүү? Дандаа та миний дэргэд байгаад байвал эрхийн тэнэг болно гэж санаа чинь зовоод эргээд ирэхгүйгээр яваад өгсөн тиймүү? Гэхдээ та надаа дэндүү хайртай болохоор ор тас орхиод явж чадахгүй орой зүүдэнд минь ирдэг тээ. Орхиод явсан ч сэтгэл нь надад хорогдоод зүүдэн дунд минь үнсээд, зүрхээ чангал гэж хэлээд явдаг тээ.

Бичкэн охин нь одоо том болсоон. Бяцхан гар нь ч, жаахан хуруу нь ч том болсон. Бараг таньтайгаа чацуу болсон доо. Ээжээс хамаагүй өндөр, 2 хөвүүнээс чинь дутахгүй шүү, ер нь л өндөр. Гэхдээ тэнэг хэвээрээээээ. Хүн болгон л том болдог, хүссэн хүсээгүй л том болдог. Нэгэнт л том болохоос цааш тэр мөчийг яаран хүсээд яахав гэж саяханыг хүртэл боддог байсан тэнэг. Гэхдээ үгүй юм аа, том болох цаг нь аль хэдийн болчихсон. Үгүй ээ, өөрөө ч мэдээгүй байхдаа би том болчихсон байна. Харин саяхан л ухаарлаа. Намайг ухаарч амжаагүй байхад хайрт эхнэр тань загнан загнан ухааруулсан, найз залуу минь ойлгоод надаа хэлж өгсөн, дотны найз минь мэдрээд толгойнд минь ойлгуулж өгсөн...

Цааш үргэлжлүүлж чадахгүй нь ээ, зүрх лугшаад цээж завчдаад, нулимс цийлэгнээд орь ганцаараа хэцүү байна. Яг энэ мөчид найз залуу минь дэргэд байсан ч болоосой.

Хорвоо дэлхийн бүх аавуудад охиноо битгий эрт орхиж яваарай гэж захия.

Гүнээ хүндэтгэсэн: Аавын хайртай охин Дархан овогт Мөнгөнбаярын Мөнхсувд